„Allir vinna“

100% endurgreiðsla á virðisaukaskatti af keyptri vinnu

Alþingi samþykkti síðastliðinn desember að framlengja aftur heimild til að endurgreiða að fullu þann virðisaukaskatt sem byggjendur íbúðar- og frístundarhúsnæðis greiða af vinnu manna á byggingarstað og af vinnu við endurbætur eða viðhald húsnæðis. Átakið "Allir vinna" hefur því verið framlengt til 1. janúar 2013. Að þessu tilefni hafa stjórnvöld í samstarfi við Samtök verslunar og þjónustu, VR og Samtök Iðnaðarins ákveðið að minna á átakið með auglýsingum sem munu birtast á næstu vikum og mánuðum.

Þegar átakið var kynnt síðast, árið 2010, mældi Capacent árangur herferðarinnar "Allir vinna" með því að nota AdEval aðferðafræðina. AdEval er leiðandi aðferðafræði við auglýsingamælingar í heiminum. Í ljós kom að markaðsátakið varð til þess að um 10 þúsund heimila á Íslandi voru sammála því að öllu eða miklu leiti að farið var í framkvæmdir á næstu 6 mánuðum vegna þess að hægt var að fá virðisaukaskatt vegna aðkeyptrar vinnu að fullu endurgreiddan. Einnig voru nokkur þúsund heimili í viðbót sem sögðust að nokkru leiti hafa farið út í framkvæmdir vegna þess að hægt var að fá virðisaukaskatt vegna aðkeyptrar vinnu að fullu endurgreiddan.